MAL MO E - The Secret Mission - 말모이

No nuşteyê xo de ez wazena behsê yew fîlm bikera. Tâyê fîlmî estê ke gama merdim înan temaşe keno binê tesîrê înan de maneno. Fîlmêk bieşko tesîrê merdiman biko bi mi no fîlm beno serkewte. Ez fîlmanê serkewte bi no hewa pênas kena; senaryoyê fîlmî baş o, kaykerdoxî rolê xo weş bi ca anê, dîyalogî weş ê, eke nê hîrê çîyê bibê no fîlm yan zî nê fîlmî hêjayê temaşekerdişî yê. La tayê fîlmî est ê, nê hîrê çîyan ver de parçeyek heyatê miletek anê ver bi çimanê temaşekerdoxan. Nê fîlman ra yew zî MAL-MO-E yo. Ez na nêvaja nêbeno mi no fîlm bi tewsîyeya mamosteyo hêja Mutlu Can'î temaşe kerd. Senarist û rejîsora fîlmî Uhm Yoo-na ya. Babeta fîlmî tarîxî-drama ya û 2019 de Koreya Başûrî de ameya antene. Çekuya mal-mo-e bi kilmvate yena manaya "arêkerdişê termanê ziwanî" û lehçeyêka verên yê Ziwanê Koreyî ra yena. 

Mi cor de biney behs kerd no fîlm parçeyêk heyatê miletê ma ana verê çimanê ma. Fîlm, behsê serebûtê tarîxî yê mabeynê serranê 1930 û 1940'î keno. Binê împaratorîya Japonya de statu û ehemîyetê ziwanê Koreyî kêm bîbî, serra 1938 de bi heme letan ver terefê Japonya ra ameybî qedexekerdiş. Tayê heskerdoxê ziwan û akademîsyenê Koreyî hemverê nê qedexeyan binê "Koma Ziwanê Korekî" de xebata xo ya ferhenga ziwanê Korekî domna. Serra 1942 de kome ra 32 kesî ameyî tepîştiş. Înan ra di kesî hepis de merdê. Kome; hemverê hepis û zîndan, teda û ezîyetî dir zî faaliyetanê xo terk nêkerde. Heta serra ke Japonya teslîmê dewletê muttefîqan bi înan faalîyetê xo domnayê. Keda înan ferhenga Korekî ya modern ser o zaf a. Hîkayeya ziwanê Korekî zafî babetan ser o mendena hikayêya şar û ziwanê ma. Bi no wesîle ez mîmarê alfabeyê ziwanê ma Celadet Alî Bedirxan û xaseten kedkarê ziwanê ma Malmîsanij û heme xîretkêş û xebatkaranê no ziwanî rê teşekur kena.

Ez wazena bê spoiler biney behsê fîlm bikera. Serra 1940 de binê îşxalê Japonya de merdimêko betal Pan-Soo yo Koreyij seba gedeyê xo dizdîya çenteyêk keno. Pan-Soo ne wendiş û ne zî nuştişê ey est o. No çente yê Jung-Hwan'î yo. Jung-Hwan temsîlkarê "Koma Ziwanê Korekî" yo. Bi no hewa yewbînan şinasnenê. Bi şinasneyişê Jung-Hwan'î heyatê Pan-Soo'yî vurîyêno. Pîya ferhenga Korekî ser o xebate kenê. 

Mal-Mo-E