Ey saqî, ti Homayî kenê kerem bike
Ti îskan û qedehê Cemî bi mey deke
Dê wa qedeh zî bi meyî cîhannuma bo
Dê wa bext û qederê ma pê eşkera bo
Wa bibo eşkera ma ver de hal û hewal
Wa biyero zanayene qeder û îqbal
Bêîqbalîye resaya gama peyêne
Ecêba hinî merg o, yan hinî merdene?
Ecêba tim wina şono, tim wina beno
No çerxê felekî tim-tim wina geyreno?
Ecêba mumkin o ke bext ma de bibo yar?
Yew estare semedê ma ra bibo dîyar
Dê wa semedê ma zî bext bibo dost û yar
Dê hinî bibo aya hewn ra, bibo hişyar
Bivejîyo ma mîyan ra sîyêk-sitarêk
Peyda bibo ma ra padîşahêk, serdarêk
Şûrê hunerê ma biyero ronayene
Qedrê qelema ma biyero zanayene
Derd û kulê ma bivîno daru û derman
Îlm û îrfanê ma bibo yê serê destan
Bibîyêne yê ma zî yewero muzafer
Fen-fikir de aver, lutf û îhsan de serwer
Darb bîyêne pereyê ma zî bi sîkkeyan
Nêbîyêne wina bêîtîbar û erjan
Her çiqas ke xalis û pak û ter-temîz ê
Sîm û zerrnî ancî bi sîkkeyan ezîz ê
Eke bibîyêne ma ra zî padîşahêk
Heqî layiq bidîyêne ci rê kilawêk
Semedê ey wa bidayêne meqam û text
Semedê ma zî wa biyêne îqbal û bext
Hasil bibîyêne semedê ey ra tacêk
Hasil biyêne semedê ma zî rewacêk
Derman biyêne derd û kulê ma sêwîyan
Şîyêne ma ser ra no hukmê sewterîyan
Muzafer nêbîyêne ma ser o nê rûmî
Nêwendêne paga ma ser o teyrê bûmî
Nêbîyêne ma perîşan û haltenikî
Ma ser o hukm nêkerdêne tirk û tacikî
Labelê ezel ra Homayî wina kerdo
Hukmê rûm-ecemî ma ser o rewa kerdo
Tabîyê înan biyayîş şermo giran o
No şermo giran yê pîlan û serdaran o
Namûs o, bi hukumdaran û bi mîreyan
Hêzê xo çi yo; yê şaîr û fiqareyan
Kam kesî ke dest berdo şimşêr bi xebate
Bi çêrîye zeft kerda, vista dest dewlete
Çimkî sey veyveka newîye yo no cîhan
Destê şimşêrê rûtî de yo hukm û ferman
La qewl û qalind, marre û marrebirnayiş
Litf û kerem, camêrdîye û bexişnayiş
Lakîn mi persayo na dinya ra bi hîkmet
"Çi yo qalindê to?" Mi rê vat: "Cehd û xîret!"
Yanî dinya pê şimşêrî û pê îhsanî
Bena tabî, bengîn û besteyê însanî
No aqilê mi nêşi karê Homayî ser
Kurmancî enê darê dinya de seraser
Gelo çi ser-sebeb ra hende mendê mehrûm,
Pêro pîya çi semedî ra bîyê mehkûm?
Înan bi şûr girewto bajarê şuhretî
Û bîyê sermîyanê dîyarê hîmetî
Çimkî her mîreyê xo emsalê Hatemî
Çimkî her egîdê xo mîsalê Rustemî
Seyr bike, erdê ereban ra ta yê gurcan
Kurmancî bîyê sey kelayan û sey bircan
Nê rûm û ecemî bi înan payîdar ê
Kurmancî dorûverê ci ra çarkenar ê
Her di terefan êl û eşîrê kurmancî
Tîranê xo rê kerdê hedef û armancî
Çira ke mifte û kîlîdê serhedan ê
Êl-eşîrê xo pêro sey sênc û bendan ê
No dengizê rûmî, no deryayê tacikî
Çi mehel xo têwbidê, bikewê çalakî
Kewenê mîyanê kurmancan sey şimşêrî
Verdenê înan ser gonî û gonîşêrî
Qelenderîye, camêrdîye hem zî hîmet
Dilawerîye, mîreyîye hem zî xîret
Nê mor ê, semedê eşîranê kurmancan
Pê şûrê hîmetî bîyê name û nîşan
Çende ke dilawerîye de xîretkar ê
Hende zî mînetdarîye de nefretkar ê
No cehd, no xîret û na pîlîya hîmetî
Manîyê wegirewtişê barê minetî
Coka yewbînî girewtiş ra tim bêpar ê
Tim yewbînan ra ciya, têver de rikdar ê
Bibîyêne mîyanê ma de pêkerdişêk
Bibîyêne yê ma zî pîyabîyayîşêk
Rûmî, erebî, ecemî bi temamîye
Hemîne zî ma rê kerdêne xulamîye
Helbet ardêne pêser ma dîn û dewlete
Helbet hasil kerdêne ma îlm û xebate
Pêser ra bîyêne cîya qisa û qalî
Bîyêne bewlî kesê wayîrê kemalî
Hiç yorum yok:
Yorum Gönder