SUCÊ KAMÎ YO

Ameyîşê hamnanî reyde dewa Qonaxî de zî hukmê germîya rojan giran bîyênî. Rez, bostan û hêgayî ke wisar de zergûn bîyênî nika pêro sey simerî zerd bibîy. Dewijî nê wextan de serê sibayî vengê melayî ra pey naxir û pezê xo ver şinayinî, vera înan dayinî koyan, palaxa ke hema fekê heywanan bide nêresaya dima şinî.  Honikêya nimajî de heywanî hina weş çerênî. Saet heya yewendes qot û newalan ra mîyanê daranê şelbêr û mazêran ra pîzeyê xo tewir bi tewir vaş û pelanê daran pir kerdinî. Gama ke saeta agêrayîşê ameynî şiwaneyê vernîya pezî dayênî dewe, bizî vernî de mêşnê zî pey de têrarêz bi gamanê hurdî hêdî hêdî ver bi dewe şinî. Nizdîyê dewe de heywanê ke zaf têşan bibînî vaz dayinî awa gole ser o. Nê hengeme de yew tozo sûrin newalanê qotan ser o wariştinî ver bi asmênî şinî. Yew pol ra vengê zingila bizan yew pol ra merayîşê biz û mêşnan, qîrayîşê şiwane, cinî û gedeyan têmîyan kewtinî. 

Nê serranê peyênan de sey heme dewanê derûverî dewa Qonaxî de zî heywan û nifûsî dewe bîbî kêmî. Xortê ke zewicîyaynî dewe de nêvindertinî vera xo dayinî bajarê Diyarbekirî uca de xorê ciwîyayinî. Ciwanê bînî zî şinî mekteb wendinî. Na rey heme kar û debarê keyeyî maye û pîyê keyeyî ser o mendinî. Qaytekerdişê heywanan zaf zehmet bi. Mavajî wesar de çerenayîş û şit ditişê înan est o, hamnan de palîye est a, gerek simer simzore de bibo pirre, haziriya zimistanî bena, îllahim seba bizan rê ganî velge biçinîyo, dêz bironîyo. Payîz tayê rehet bo zî gama bi zimistan derdo pîl destpêkerdinî. Yew pol ra vewre û varan yew pol ra serd û seqem, şilî û şepelî.. Biz û mêşnê zimistanî de zêyayinî zehmetîye bînî di qatî. Ganî axurî her roje pak bibênî, simer û awa înan amade bibênî. Yanî nê heme karan merdimêk tena nêeşkenaynî biko. Seba ney ra dewijan heywananê xo yan rotenî yan zî kêmî kerdenî. La emserr çîyêko ecêb qewimîyaybî. Pîy û datê Seferî wesar de têmîyan nezdiyê se hebî mêşnê erênayibî. Goreyê hesabê înan heta payîzî qeyta bikerdenî fîyetê înan vêşî bînî û înan birotenî do yew karêko weş bikerdenî. Hem hamnanî mekteb zî tatîl bînî gedeyî zî înan rê ardim kerdenî. Di-hîrê aşmî wina dewam kerd. Hela nimajî zafane datê Seferî şiyenê pezî ver hela şanî zî yan Sefer yan zî ey û birayê ey mabeynê xo de newbe kerdenî.  

Datê Seferî aye roje reyna serê sibayî hewn ra warişt. Destmajê xo girewte, nimajê xo kerd. Honikêya nimajî de mêşnê gewe ra teber kerdî û vera înan da yaban. Hamnanî nê bêmiradî zaf germ kenê. Sereyê xo dekenê binê dimê yewbînan wina hêdî hêdî rayîr şonê. Bi no hewa xo germê rojî ra pawenê la şiwaneyo feqîr zî merez kenê.  Nêbo yewe sîya dare bivînê aye ra quçe benê colî ra tepa manenê. 

Ewro zî saet nizdîyê yewendes de datê Seferî vernî de mêşnê peya ey de newalê zîyare ra vecîyayê ver bi dewe ameyê. Hewza sontaje ser o awa xo werdê û hetê sîya daran ra şîyê. 

Mîyanê rojî de heywanê dewe binê sîya daranê tuyêran de mexel kewtinî. La nê mêşnê datê Seferî hetê Gorxaneyî de binê seya daranê belûyan ra şinî uca de mexel kewtinî. Teştere ra dima germê rojî taye bişikîyaynî cayê xo ra hewna wariştinî sontaje ser o awa xo şimitnayinî rayîrê yabanî kewtinî. Rey-rey zî ganî kesêk bişeynî înan sîya daran ra biwariznaynî. Seferî aye roje saet nizdîyê hîrê de înan seya daran ra wariznayê. Sontaje ser o awe daye û vera înan da hetê Tirsî ra. 

Sefer hema heştês serre yew xortêko ciwan bi. Şiwanetî ra êdî eciz bibî. Mecbûr nêbibînî yew deqa dewe de nêmendenî la baş o ke abîyayîşê mektebî rê tayê wext mendebî. Mekteb de dersanê xo de zî jîyatî bi. Wendişî ra hes kerdenî. Pîyê Seferî jîyatîbîyayîşê gedeyanê xo rey kêfdar bibîynî zî no heskerdişê xo qet nênawitinî. Goreyê ey heywanî verde kitab wendiş çîyêko nebaş bi. Rey-rey gama ke gedeyê ey goş qalanê ey nêbikerdenî hêrs bînî vatinî; şîyê qanûnê Atatirkî wendê coka wina kenê. Sefer bi tersanê nê qalan ver aye roje bi dizdî kitab xo reyde berdibî. 

Raşteyê warê erd de çimanê xo mêşnan ser o çarnayê. Çimanê ey de tayê xuya kerdî la qet aqil nêkerd înan bihûmaro. Dinya êdî honik bibî. Mêşnê hetê wareyê Tirsî ra bi çereyîş şinî. Sefer zî peya înan de rey-rey kitab wendinî rey-rey zî xo rê fikirîyaynê. Mîyanê daranê şelbêran ra acor şî.  Mêşnê daristanî mîyan ra vecîyayê raşteyê qotikan û dest bi çereyaşî kerdî. Heta a deqa yew çîyêko ecêb çinî bî. Sefer yew de ferq kerd ke yew mêşna nizdîyê se metre dûrî de hetê colî ra yena. Senî ke na mêşna ferq kerde yew hîsêko nêweş ganê ey girote. Rîyê ey tirş bi, çimê ey biloq bîyê mêşna ser o mendî. Rayîrşîyayîşê mêşna zaf ecêb bi. Qirika xo tîk kerdibî û rasterast hetê colî ra ameynî. Nizdîbîyayîşê mêşna rê gup-gupîya qelbê ey vêşî bî. Heta ewro ey verde vergî heywanî birîndar nêkerdibî. La nika yew mêşna çimanê ey verde birîndar bîbî û qirika aye ra gunî dilope kerdinî. Gilîyê çimanê ci xişin bîy, bêhîs û bênefes mend. Heta ke şok xoser vîyarna û ame bi xo mêşna mîyanê colî resabî. Mêşnê ke heta nika qet nêtersabî êdî dare, kerre û mîlçikan ra û sîya xo ra zî tersayinî. No tersê Seferî hina vêşî kerd. Nat-wet polê xo ra dormareyê qotan ra ewnîya vergî ra nîşan çîyêk çin bi. Biaqilî kerd bi lez û bez mêşnê hûmaritî. No çi bela bi na çi gosirmete bî? Hema panc hebî mêşnê kemî bî. Telefonê ey zî çin bi ke xeber bido keyeyî. Mêşnê xover dayî hetê dewe ra ser berdî. Xeber keye resna û şopa xo dima agêra. Mezgê ey de tena no pers est bi. Ez do senî hesab bida pîyê xo? Şopa xo dima şi la ne ganî ne merde çîyêk nêdî. Ey ra nizdîye di km dûrî de pezê dewijan dî lez kerd şi şiwaneyan ra persa. Di hebî mêşnê çi ca ra ameybî nêzanayinî la dekewtibî mîyanê pezê înan. Serê şandî di mêşnêy bi birîndar xovero ameyê keye û yew zî roja bîne beletê ca ame vînayene. Nê mêşnê hela nimajî de reyra de mendibî yan vergan hela şanî Sefero feqîr verde gurotî bî kesêk nêzanayinî la kul û keser û derd û qotik pêro vîyeyê Seferî de mendî.